Tēnā koutou,

Nau mai haere mai,

Te tīmatanga o ngā karakia a te Haahi Ringatū. He hōnore he korōria he maungarongo ki te whenua he whakaaro pai ki ngā tāngata katoa, Amine. Kei ngā mate o te wā, haere whakangaro atu koutou ki te huihuinga nui o te pō whakaoti atu ai. Ki a tātou te hunga ora e pae nei, tēnā tātou katoa.

Tēnā koutou e ngā whānau me ngā mātua, kuia, koroua o ā tātou tamariki mokopuna. Nau mai haere mai ki te kura-ā-iwi o Te Whata Tau ō Pūtauaki. He kura i whakaarahia ake e ngā whānau me ngā pākeke o te wā. Mai anō i tōna oroko tīmatanga mai, kua noho a Te Whata Tau ō Pūtauaki hei whakamarumarutanga mō ngā whānau o te hāpori nei o Kawerau, puta noa atu ki Te Teko huri noa i te rohe o Ngāti Awa, o Tūwharetoa ki Kawerau, ki roto hoki i a Ngāi Tūhoe.

He kura kua neke atu i te tekau tau te roa e whakakotahi ana i ngā whānau me ngā uri o te rohe nei, i raro tonu i te taumarumarutanga o tō tātou koroua nei a Pūtauaki, me ngā awa e rere ana ā, puta noa atu ki te wahapū o te Whakatāne, ki Ōkōrero. He kāwai heke ngā tamariki mokopuna o tēnei kura nō ngā iwi o Tūwharetoa ki Kawerau, o Ngāti Awa, o Tūhoe, puta noa i te rohe whānui.

Nō reira, e te whānau. Kia hoki ake au ki te whakataukī i whakairihia ake e ngā pākeke i te tīmatatanga o tō mātou kura, e kī ana, whāia te mātauranga kia ‘Tītia ki te ngākau, hei whata toi tū’.

Aku mihi nui,

Nāku nā,

Ripeka Lessels

Principal